Трамп: Газа е вредна локација, би било добро да им припадне на САД

Претседателот на САД, Доналд Трамп повторно изјави дека би сакал Америка да ја преземе контролата врз Појасот Газа, нарекувајќи ја оваа палестинска територија „неверојатно вредна и стратешки важна земја“.

„Би било одлично ако САД имаат мировни сили кои ќе управуваат и ќе го поседуваат Појасот Газа. Тоа би било добро“, рече Трамп, говорејќи од Белата куќа, во присуство на израелскиот премиер Бенјамин Нетанјаху.

Трамп уште еднаш ја изнесе идејата за преселување на палестинското население од Газа, тврдејќи дека „многу земји“ ќе бидат подготвени да ги прифатат 2,1 милиони Палестинци кои ќе бидат раселени.

Сепак, регионалните сојузници веќе ја отфрлија таквата идеја, наведувајќи дека присилното раселување може да претставува воено злосторство.

Според Обединетите нации, израелската воена кампања против Хамас досега принудила околу 90% од населението на Газа да ги напушти своите домови.

„Ако ги преместите овие луѓе, Палестинците, во различни земји – и има многу земји кои би го направиле тоа – тогаш всушност добивате зона на слобода. Може да ја наречете слободна зона, зона без смрт. Место каде што луѓето нема да умираат секој ден“, рече Трамп.

Трамп потоа додаде: „Тоа е проклето добра локација. Јас го нарекувам одлично место во кое никој не сака да живее“.

Share on Facebook

Tweet

Follow us

Save