Изборот на нов папа нема да трае долго, проценува Ватикан

Во Ватикан, подготовките се во полн ек за конклавата што започнува во среда, а работниците вчера го поставија церемонијалниот оџак на покривот на Систинската капела. Белиот чад од тој оџак ќе биде знак дека е избран 267-миот папа.

„Конклавата ќе биде кратка“, изјави за „Еј-би-си њуз“ кардиналот Грегорио Роза Чавез од Ел Салвадор, кој верува дека на Црквата ѝ е потребен „Франциск 2“. „Мислам дека постои консензус и дека е многу јасно каков папа ни е потребен за Црквата и за светот. Затоа мислам дека конклавата ќе трае два или три дена.“

Чавез, кој има 82 години и не може да гласа, сепак присуствуваше на општите собранија во Ватикан оваа недела, каде што фаворитите веќе почнаа да се појавуваат.

Повеќето кардинали од целиот свет веќе пристигнаа во Ватикан и секојдневно учествуваат на општите собранија – клучно време пред почетокот на конклавата, кога кардиналите држат говори, се запознаваат подобро и дискутираат каков папа сакаат.

Тие сè уште не се затворени во конклавата, па затоа многумина може да се видат како излегуваат на плоштадот „Свети Петар“ меѓу јавноста по состаноците. Некои, како кардиналот Тимоти Долан од Њујорк, објавуваат дневни новости на социјалните медиуми, давајќи увид во древните црковни традиции.

На оваа конклава, рекордни 133 кардинали ќе имаат право на глас, a 108 од нив беа назначени од покојниот папа Франциск.

Кога ќе започне конклавата следната недела, сите кардинали ќе положат заклетва за тајност, а потоа ќе почнат да гласаат двапати дневно – двапати наутро и двапати попладне – сè додека две третини од кардиналите не постигнат договор за нов папа.

По секое гласање, гласачките ливчиња се горат. Црниот чад од оџакот значи дека папата сè уште не е избран и дека гласањето продолжува. Белиот чад значи дека Католичката црква има нов водач.

Share on Facebook

Tweet

Follow us

Save