Тонино Пицула: Србија не напредува кон ЕУ

Заминувањето на српскиот претседател Александар Вучиќ во Москва се случи во време кога тоа не требаше да се случи, изјави денеска известувачот на Европскиот парламент за Западен Балкан и Србија, Тонино Пицула, оценувајќи дека Србија не е меѓу земјите кои напредуваат кон Европската унија.

Пицула, коментирајќи ја за телевизијата N1 денешната посета на претседателот на Европскиот совет – Антонио Кошта на Белград, рече дека е добро што регионалната турнеја ја започнал во Белград бидејќи има „многу теми за кои треба да се разговара“.

„Заминувањето на Вучиќ во Москва не е спореден настан, тоа се случи во време кога не требаше да се случи, кога политиката на проширување има смисла за некои земји и тие напредуваат, но за жал Србија не е меѓу нив“, рече Пицула.

Тој оцени дека парадата во Москва не била организирана само со цел да се одбележи победата над фашизмот, „туку всушност да се испита до кој степен самиот Путин ја ужива поддршката на одредени светски лидери“.

Пицула смета дека изложеноста на Вучиќ на критиките од Брисел е „повеќе од јасна“.

„Посебно што имаше предупредувања од Европската унија дека оние кои тропаат на вратата на ЕУ и кои се сметаат себеси за демократски држави немаат што да прават во овој момент на Црвениот плоштад“, рече Пицула.

Посетата на Москва предизвика голем отпор кон шансите на властите во Србија да ги отстранат блокадите на европскиот пат, додаде Пицула и потсети на фактот дека Србија има мал напредок од 2012 година, кога има статус на кандидат.

Според неговото мислење, кога е во прашање отворањето на кластерот три, официјален Белград нема многу причини за оптимизам.

Share on Facebook

Tweet

Follow us

Save