Германски генерал предупредува: Русија би можела да го нападне НАТО до 2029 година

Началникот на германската армија, генерал Карстен Бројер, издаде наредба со која се бара Бундесверот (германските вооружени сили) да биде целосно опремен со соодветно вооружување и воена опрема најдоцна до 2029 година.

Како што пренесува агенцијата Reuters, Бројер и други високи претставници на НАТО сметаат дека Русија би можела до тогаш да ги обнови своите воени капацитети до ниво што претставува сериозна закана за територијата на Алијансата.

Во документот насловен „Директива за приоритети за зајакнување на борбената подготвеност“, кој генерал Бројер го потпиша на 19 мај, се наведува дека Германија ќе го постигне овој стратешки приоритет со помош на дополнителни средства предвидени по последното олабавување на фискалното правило за задолжување во март.

Иако од Министерството за одбрана во Берлин сè уште нема официјален коментар, содржината на документот јасно ги прикажува безбедносните приоритети на Германија, кои се во голема мера усогласени со стратешките насоки на НАТО.

Генералот Бројер посебен акцент става на потребата од значително зајакнување на противвоздушната одбрана, со фокус на пресретнување беспилотни летала. Според минатогодишен извештај на Reuters, НАТО очекува Германија да ги зголеми капацитетите за воздушна одбрана дури четирикратно – од системи со долг дострел како „Патриот“, до системи со краток дострел.

Друг клучен приоритет е развојот на способности за прецизни удари на далечини поголеми од 500 километри, односно длабоко зад непријателските линии.

Директивата, покрај модернизација на вооружувањето, предвидува и значително зголемување на залихите на муниција од сите видови. Дополнително, како стратешка цел е наведено и проширување на капацитетите за електронско војување, како и воспоставување на отпорен систем за офанзивни и дефанзивни операции во вселената.

Предупредувањето на генерал Бројер доаѓа по изјавата на шефот на германската војска, Алфонс Маис, кој во средината на мај предупреди дека Русија веќе ги мобилизира своите индустриски и општествени ресурси за зголемување на воените капацитети.

„Најдоцна до 2029 година, руските сили би можеле да бидат способни за конвенционална агресија од големи размери врз територијата на НАТО“, изјави Маис. „Но, не е исклучено да почнат да нè тестираат и многу порано.“

Share on Facebook

Tweet

Follow us

Save