Биткоин постави нов рекорд од над 116.000 долари во пресрет на Неделата на криптовалутите во САД

Биткоин достигна нова историска вредност од 116.626 долари, откако вчера порасна за повеќе од 4% и околу 19:35 часот по локално време ја проби границата од 116.000 долари. Ова е највисока вредност на водечката криптовалута од 22 мај, кога претходно го достигна прагот од речиси 113.000 долари.

Овој пораст се случува во пресрет на т.н. Недела на криптовалутите, најавена од Комитетот за финансиски услуги на Претставничкиот дом на САД, под водство на републиканците. Таа ќе се одржи од 14 јули и има за цел разгледување законски решенија за поддршка на криптовалутите, меѓу кои и GENIUS Законот, кој треба да ги постави темелите на федералната регулатива за стабилни дигитални валути (stablecoins).

Раст и кај другите криптовалути

И другите криптовалути забележаа пораст во изминатите 24 часа:

Ethereum порасна за 7%
XRP за 5,3%
Solana за 4,3%
Dogecoin, популарниот „меме токен“, за 6,2%
Покрај законодавната поддршка, растот на пазарот се должи и на крупни инвестиции: компанијата GameStop во мај вложи околу 513 милиони долари во биткоин, а Trump Media and Technology Group најави планови за собирање 2,5 милијарди долари за корпоративни резерви во биткоин.

Зошто GENIUS законот е важен?

GENIUS Законот, предложен во февруари од сенаторот Бил Хагерти, предвидува обврска издавачите на стабилни дигитални валути да поседуваат реални резерви што ја поддржуваат нивната вредност, со цел заштита на потрошувачите и стабилизирање на криптопазарот. Законот е веќе изгласан во Сенатот со 66 гласа „за“ и 32 „против“.

Вкупна вредност на криптопазарот

Во последните 24 часа, вкупната пазарна вредност на глобалниот криптопазар порасна за околу 160 милијарди долари, достигнувајќи 3,69 трилиони долари, според податоците на CoinGecko.

Сè поголемото внимание на законодавците и новите инвеститори кон дигиталните средства укажува дека криптовалутите продолжуваат да се етаблираат како сериозен финансиски инструмент на глобалната сцена.

Share on Facebook

Tweet

Follow us

Save