INFOMAX.MK

Српскиот претседател Александар Вучиќ објави дека го посетил министерот Дарко Глишиќ во Ургентниот центар откако доживеал мозочен удар, наведувајќи дека разговарал со Глишиќ и дека се чувствува подобро.

„Дојдов во Клиничкиот центар на Србија и го посетив Дарко Глишиќ и сакам да ви кажам прекрасни вести. Дарко е подобро, разговарав со него. Тој сè уште се мачи малку, но не можам да ви ја опишам мојата радост и неговата. Србија не може да биде поразена. Нема предавање, да живее Србија“, рече претседателот синоќа на инстаграм-профилот „buducnostsrbijeav“.

Министерот за јавни инвестиции Дарко Глишиќ, кој доживеа мозочен удар за време на гостувањето на ТВ Пинк, беше опериран и се наоѓа на одделението за интензивна нега во Клиничкиот центар на Србија, изјави синоќа министерот за здравство Златибор Лончар.

Лончар изјави дека интервенцијата била сложена и комплицирана и дека траела подолго од вообичаеното бидејќи, како што изјавил, биле оштетени два крвни сада, пренесува РТС.

„Едниот голем крвен сад беше целосно блокиран, а другиот не само што беше блокиран, туку и крвареше. Лекарите успеаја да го решат проблемот со двата крвни сада и сега тие имаат проток на крв“, изјави Лончар за новинарите во Ургентниот центар, се наведува во текстот.

Како што истакна синоќа, Глишиќ е сè уште во сериозна состојба и го очекува сериозна борба.

„Причината е елиминирана, но ќе видиме како неговото тело ќе реагира на понатамошната терапија што мора да ја добие“, рече Лончар.