INFOMAX.MK

Директорот на Дирекцијата за заштита и спасување Стојанче Ангелов денеска информираше дека во текот на денот досега се регистрирани шест пожари на отворено, од кои четири се изгаснати, а активни остануваат пожарот во НП „Јасен“, кој е најсериозен, и пожарот кој денеска го зафати прилепското село Беловодица, каде на испомош е испратен еден „ер трактор“.

„Во текот на денешниот досега имаме најмалку шест пожари на отворено, два се активни, а останатите изгаснати. Нов шожар е пожарот во атарот на селото Беловодица, општина Прилеп кој што се одвива на големи височини и тешко пристапен терен, поради што денеска испративме еден „ер трактор“ да помогне на прилепските пожарникари“, вели Ангелов.

Тој додаде дека и понатаму, најсериозен пожар останува оној во стрелиштето Јасен, каде има еден активен крак.

„И понатаму најтешкиот пожар останува оној во ловиштето Јасен, кој со деновиве се одвива овде и пожар врз кој дождот немаше никакво влијание, но благодарение на пожртвуваната акција од страна на полициските и армиските специјалци, ги затворивме горните кракови, се разбира и со поддршка со вработените на „Јасен“, „Национални шуми“ и пожарникарите од скопската противпожарна бригада“, додаде директорот.

Ангелов информираше дека од пожарот во „Јасен“ е активен само еден крак, кој оди во насока од ловиштето кон езерото Козјак, односно до ресторанот кој се наоѓа на врвот над езерото.