INFOMAX.MK

Шведскиот министер за одбрана Пал Јонсон денес објави дека владата денес одлучила градот Енцепинг на истокот од земјата да стане логистички центар на НАТО од каде што ќе се управува со движењето на трупите на НАТО во Северна Европа.

Според него, одлуката доаѓа по завршените преговори со Алијансата и е дел од поширока стратегија за зајакнување на присуството на НАТО во регионот.

„Шведска има важна географска позиција во рамките на НАТО и нашата способност за движење на ресурси и персонал ќе биде клучна“, рече Јонсон.

Како што изјави, во Енцепинг ќе биде формиран логистички штаб со околу 70 вработени под команда на НАТО, кој ќе координира големи воени транспортни операции, особено во случај на вооружен конфликт или влошување на безбедносната состојба во балтичкиот регион.

„Логистичкиот центар ќе овозможи ефикасен транспорт на војници, опрема, муниција и гориво, особено во сценарија каде што војници од Северна Америка се истоваруваат во норвешките пристаништа, а потоа се преместуваат преку Шведска во Финска и балтичките земји“, додаде Џонсон.

Тој истакна дека се очекува центарот да поддржи можен трансфер на војници до големина на дивизија, односно повеќе од 20.000 војници.

„Зборуваме за можноста за транспорт на голем број персонал и материјали како што се гориво, муниција и резервни делови“, рече Џонсон.

Началникот на Генералштабот на шведските вооружени сили, Михаел Класон, рече дека шведската армија, во соработка со безбедносните служби, веќе работи на подготовка на инфраструктурата и заштита на базата од потенцијални саботажи и хибридни закани.

„Шведска сега ќе има важни области на одговорност и во логистичките и во мисиите за одвраќање во близина на руската граница, како што е учеството во базите на фронтовската линија во Латвија и Финска“, додаде тој.

Логистичката база во Енцепинг ќе биде одговорна за оперативна област што ги вклучува Северна Америка, Велика Британија и нордиските земји, според шведската јавна служба.