Филипче: Економската политика на Владата на ВМРО-ДПМНЕ е најлошата во историјата

На денешната прес-конференција, претседателот на СДСМ Д-р, Венко Филипче, посочи дека власта, наместо за мерки за граѓаните, буџетските пари ги користи за свои лични интереси.

После 15 месеци власт на ВМРО-ДПМНЕ, може да оцениме дека економската политика на оваа влада е најлошата во историјата, изјави претседателот на Социјалдемократскиот сојуз на Македонија, д-р Венко Филипче.

„Десетици милиони евра се буквално украдени од граѓаните преку непреземање мерки за цените, преку непокачување на платите, преку растот на нееднаквоста и сиромаштијата, што е свесна и намерна политика на оваа власт“, рече Филипче.

Притоа, тој посочи дека за разлика од ВМРО-ДПМНЕ, СДСМ имаше и сè уште има подобри економски политики во интерес на граѓаните.

„Ако нешто може со сигурност да го кажам, тоа е дека СДСМ имаше и сè уште има далеку подобри економски политики насочени кон граѓаните, со грижа за стандардот и со јасна цел – економија што им служи на граѓаните“, изјави Филипче.

На прес-конференцијата, Филипче нагласи дека СДСМ нема да отстапи од решенијата кои веќе ги предложи, а владејачкото мнозинство не ги прифати, за справување со инфлацијата и заштита на стандардот на граѓаните.

„Нема да отстапиме од нашата борба и од нашите предлози. Раст на платите во сите сектори, зголемување на минималната плата на најмалку 500 евра, намалување на цените преку укинување на ДДВ за основните прехранбени производи – тоа се мерки кои што веќе ги предложивме во Собранието. За жал, владејачкото мнозинство не ги поддржа. Ќе продолжиме, ќе ги поднесеме уште еднаш и понатаму. И нема да отстапиме во таа битка за достоинствен живот, за подобар стандард на граѓаните“, порача претседателот на СДСМ, Венко Филипче.

Share on Facebook

Tweet

Follow us

Save