Трамп: Би сакал Кина да ни помогне со Русија

Американскиот претседател Доналд Трамп во понеделник изјави дека би сакал Кина да му помогне на Вашингтон во односите со Русија.

„Би сакал Кина да ни помогне со Русија“, им рече Трамп на новинарите во „Ер Форс Уан“ пред да слета во Малезија, објави Ројтерс. Тој, исто така, изрази увереност дека Русија сака мир во Украина. „Ќе видиме, мислам дека Владимир Путин сака конфликтот да заврши“, им рече Трамп на новинарите.

Трамп е на патување во Азија за да разговара за инвестициски договори, мировни иницијативи и трговски прашања. Неговата прва станица е Малезија, каде што ќе присуствува на регионален самит и ќе се сретне со премиерот на земјата Анвар Ибрахим, како и со лидерите на Тајланд и Камбоџа за да потпишат проширен договор за прекин на огнот меѓу двата соседа, објави АП.

Американскиот претседател рече дека „должил посета“ на малезискиот премиер, кого го нарече „многу добар човек“. По Малезија, Трамп ќе ги посети Јапонија и Јужна Кореја, каде што се очекува да се сретне со кинескиот претседател Си Џинпинг на маргините на самитот на Азиско-пацифичката економска соработка (АПЕК) во јужнокорејскиот град Бусан.

Трамп рече дека очекува добра средба со Си и е оптимист за постигнување фантастичен договор меѓу двете земји. Трамп ќе се сретне со новиот јапонски премиер Санае Такаичи во Токио и се очекува да разговара за инвестициски договори во вредност од околу 900 милијарди долари во замена за намалување на планираните американски царини. За време на турнејата, Трамп би можел да разговара и со бразилскиот претседател Луиз Инасио Лула да Силва за можни намалувања на царините и регионална соработка. Белата куќа сè уште не ја потврдила средбата.

Share on Facebook

Tweet

Follow us

Save