Словачка: Масовни протести против владата на Фицо

Десетици илјади луѓе демонстрираа против владата на левичарскиот премиер Роберт Фико во Словачка. Бројни опозициски партии и невладини организации, како што е иницијативата „Мир за Украина“, повикаа на протести.

Настани и демонстрации се одржаа во многу градови. Околу 50.000 луѓе се собраа на Плоштадот на слободата во Братислава, спроти седиштето на владата, и покрај дождливото време, според податоците на организаторите. Меѓу другото, тие побараа поголема поддршка за Украина. Фицо ја запре целата воена помош од Словачка.

Пред сè, толпата извикуваше слогани како „Доста ни е од Фицо!“ и држеше транспаренти со кои се бараше крај на владата составена од три коалициски партии а предводена од Фицо. Тие ја обвинија владата дека ја загрозува демократијата и ги критикуваа актуелните мерки за штедење за борба против високиот државен долг.

Протестите се одржаа по повод 36-годишнината од „Кадифената револуција“ од 1989 година против комунистичкиот режим. Лидерот на либералната опозиција, Михал Симечка, чија партија на последните анкети веќе е пред партијата Смер на Фицо, во својот говор направи паралела помеѓу тогаш и сега: храброста и желбата за слобода ги мотивираа демонстрантите во 1989 година за нивните, на крај, успешни протести. „Ова се токму двете вредности кои комунистите не ги разбираа и кои ни Роберт Фицо не ги разбира денес. Затоа и тој ќе изгуби, исто како што изгубија комунистите“, го цитираше опозицискиот политичар агенцијата ТАСР.

Во претходните денови, локален протест на ученици го привлече вниманието на медиумите. Пред планираната посета на Фицо на средно училиште, еден ученик напиша остра критика со креда на подот пред влезот. Видеото прикажува како за тоа е критикуван од лице кое веројатно припаѓа на училиштето, но го брани опозициска политичарка која, исто така, е присутна. Акцијата доведе до повици за „Креда револуција“ на интернет. Оттогаш, таму можат да се најдат бројни снимки од слогани против владата напишани со креда.

Share on Facebook

Tweet

Follow us

Save