INFOMAX.MK

Неодамнешните судири меѓу Тајланд и Камбоџа се проширија, со сè повеќе пријавени смртни случаи, додека илјадници луѓе се раселени, пренесува Би-би-си.

Камбоџа соопшти дека уште двајца цивили се убиени во гранатирање извршено преку ноќ од страна на тајландските сили, со што бројот на жртви се искачи на седум. Тајланд соопшти дека се убиени најмалку тројца војници.

Двете страни се обвинуваат меѓусебно за судирите, кои го поништија кревкото примирје постигнато со посредство на американскиот претседател Доналд Трамп претходно во јули.

Од понеделник навечер, судирите се проширија во провинциите Сурин, Бури Рам, Са Каео и Трат во Тајланд, како и во провинциите Бантеј Минчеј и Пурсат во Камбоџа.

Двете страни се обвинуваат меѓусебно за гаѓање цивилни области, тврдејќи дека се придржуваат до меѓународното право.

Ова следува по меѓусебните обвинувања од двете земји за тоа како започнале конфликтите.

Тајланд соопшти дека нејзините сили одговориле на камбоџанскиот оган во тајландската покраина Убон Рачатани, вклучително и со воздушни напади по спорната граница, додека Министерството за одбрана на Пном Пен соопшти дека тајландските сили први нападнале во камбоџанската покраина Преах Вихер.

Еден век контроверзии

Овој спор датира од пред повеќе од еден век, кога беа дефинирани границите на двете земји.

Кога Камбоџа се обиде да регистрира храм од 11 век во спорната област како светско наследство на УНЕСКО во 2008 година, се соочи со силни протести од Тајланд.

Во следните години, овие тензии се развија во спорадични гранични судири, што резултираа со смрт и ранување на војници од двете страни.

Пред судирите оваа недела, повеќе од 40 лица беа убиени во жестоки борби во јули, предизвикани од смртта на камбоџански војник во граничен судир.