INFOMAX.MK

СДСМ денеска поднесе официјална пријава до антикорупскицската комисија во врска со случајот „Сити Аутсорсинг“.

Како што велат од опозициската партија, станува збор за фирма која има добиено вкупно 161 тендер во вредност од околу 9 милиони евра, а само во текот на оваа година остварила приходи од речиси половина милион евра. Од партијата тврдат дека постојат семејни врски меѓу сопственичката структура на фирмата и Ивица Томовски, актуелен директор на Службата за општи и заеднички работи (СОЗР).

Иако ДКСК минатата недела отвори предмет за овој случај, од СДСМ порачуваат дека нема да дозволат тој да заврши без темелна истрага.

„Со пријавата бараме ДКСК детално да ги испита и донациите кои Ивица Томовски ги давал на ВМРО-ДПМНЕ, а кои во неколку наврати надминуваат вкупна сума од 800.000 денари“, истакна Петар Огњеновиќ.

Од СДСМ прашуваат какво е потеклото на средствата со кои Томовски ги вршел донациите, дали тие се поврзани со фирмата „Сити Аутсорсинг“ и како, според нив, е возможно ваква сума да биде донирана исклучиво од плата, имајќи предвид дека Томовски јавно негира поврзаност со каков било приватен бизнис.

Партијата апелира ДКСК да спроведе целосна и транспарентна истрага и да даде јасни одговори на овие прашања.