Објавени причините за смртта на новороденчето: Масивен пнеумоторакс, едем на мозокот и кардиореспираторна инсуфициенција

Државниот санитарен и здравствен инспекторат (ДСЗИ) информира дека примил медицинска документација во врска со смртта на новороденче од Арачиново, кое почина на 1 октомври на Клиниката за гинекологија и акушерство во Скопје. Како причини за смртта се наведуваат масивен пнеумоторакс, белодробен емфизем, едем на мозокот и кардиореспираторна инсуфициенција.

Директорот на ДСЗИ, Кирил Лазов, соопшти дека до Министерството за здравство е доставена иницијатива за формирање стручна комисија која ќе утврди дали во третманот на новороденчето имало пропусти. Исто така, бил извршен и вонреден инспекциски надзор на клиниката.

Според медицинската документација, родилката била хоспитализирана како итен случај на 27 септември и породувана со царски рез на 28 септември. Новороденчето било префрлено на интензивна нега поради респираторни компликации, интубирано и ставено на антибиотска терапија. Состојбата нагло се влошила на 1 октомври, а и покрај мерките и реанимацијата, детето починало.

Обдукцијата е побарана, но извештајот сè уште не е готов. Родителите најавија тужба против Клиниката, а случајот го истражува и Јавното обвинителство. Две специјализантки претходно посочиле на можни пропусти од педијатарката на интензивната нега, која е префрлена на друг оддел.

Share on Facebook

Tweet

Follow us

Save