Турција годинава ја погодија 53.262 земјотреси

Турција годинава ја погодија вкупно 53.262 земјотреси, во просек шест земјотреси на секој час, што е втора година со најмногу регистрирани потреси во земјата, веднаш по 2023 година, изјави денеска професорот на Универзитетот Гази во Анкара, Булент Озмен.

Според него, во текот на 2025 година се забележани 437 земјотреси со јачина поголема од 4 степени според Рихтеровата скала, од кои 412 биле со јачина од 4 до 5, 20 помеѓу 5 и 6, додека пет земјотреси биле со јачина од 6 до 6,9 степени.

– Овие податоци покажуваат дека во Турција во просек секој ден се случува по еден земјотрес со јачина од 4 степени, на околу 15 дена земјотрес со јачина од 5 и повеќе, а на секои 73 дена потрес со јачина од 6 и повеќе степени. Тоа значи дека земјата во просек е погодена со околу шест земјотреси на час, односно 146 дневно, изјави Озмен за агенцијата Анадолија.

Најзначајниот земјотрес во годината, како што рече, бил потресот со јачина од 6,2 степени кој на 23 април го погоди Силиври, а кој, според неговата оценка, уште еднаш потврди дека сеизмичкиот ризик во Истанбул и понатаму е висок. Како втора важна низа земјотреси ги издвои двата потреси со јачина од 6,1 степен кои на 10 август и 27 октомври го погодија Синдрги. Од 10 август до денеска во тоа подрачје се регистрирани околу 21.000 земјотреси, што може да се смета за најголем број потреси некогаш забележани во еден округ во Турција.

Озмен предупреди дека во Турција и понатаму постојат голем број објекти кои не се отпорни на земјотреси, наведувајќи дека и потресите со јачина над 5 степени понекогаш доведуваат до сериозни оштетувања, поради што, како што истакна, неопходно е да се забрзаат проектите за обнова.

Во земјотресите во текот на 2025 година загинаа три лица, додека 594 луѓе беа повредени, при што сите повреди, како што наведе, биле последица на паника. Озмен оцени дека тие податоци јасно укажуваат на потребата од зголемување на бројот на едукации за однесување во вонредни ситуации, кои би требало да ги спроведуваат стручни и квалификувани лица.

Share on Facebook

Tweet

Follow us

Save