Бугарија инвестира 10,7 милиони евра во нов развоен вселенски центар во Софија

Бугарската компанија за производство на наносателити ЕндуроСат планира значително проширување на својот развоен капацитет во Бугарија со изградба на нов Развоен вселенски центар вреден 10,7 милиони евра. Проектот е формално одобрен со одлука на бугарскиот Министерски совет, кој даде зелено светло за потпишување Меморандум за разбирање меѓу државата и компанијата предводена од основачот Рајчо Рајчев.

Новиот центар ќе биде изграден во Софија, најверојатно во новиот објект на булеварот „Цариградско шосе“, и ќе биде опремен со напредни машини и современи технологии за развој на нова класа сателити. Со инвестицијата се очекува отворање на околу 50 нови работни места за висококвалификувани инженери и експерти во областа на вселенските технологии. Со владината одлука е формирана и меѓуресорска работна група која ќе обезбедува институционална поддршка за реализација на проектот. Во официјалните информации не се наведува директна финансиска поддршка од државата, но проектот е прогласен за „приоритетен“, што значи дека има особено значење за економскиот развој на земјата согласно Законот за поттикнување на инвестициите.

Политиката за вакви инвестиции ја спроведува Министерството за иновации и раст. Од Министерскиот совет нагласуваат дека реализацијата на проектот ќе придонесе за зајакнување на вселенскиот сектор во Бугарија и ќе отвори нови можности за развој на човечки капитал во високо-технолошки области. Сите развојни активности и производи се наменети за извоз, при што клучни пазари се САД, Европската Унија, Јапонија и други високоразвиени економии. Инвестицијата дополнително ја потврдува позицијата на Бугарија како активен учесник во глобалната вселенска економија.

Земјата има долгогодишна традиција во оваа област и е една од ретките во регионот што може да се пофали со двајца космонаути кои учествувале во вселенски мисии, што претставува значаен симболички и технолошки капитал. Со новиот развоен центар, Бугарија јасно сигнализира дека има амбиција да ја надгради таа традиција и да се позиционира како релевантен европски хаб за вселенски технологии.

Share on Facebook

Tweet

Follow us

Save