Трамп: Можам да ги натерам земјите кои не ја платиле членарината во ОН веднаш да го сторат тоа

Американскиот претседател Доналд Трамп изјави дека многу лесно може да го реши финансискиот проблем на Обединетите нации така што ќе ги натера земјите кои не ја платиле членарината во ОН веднаш да го сторат тоа.

Трамп, во телефонски разговор за „Политико“, рече дека не е запознаен со тоа дека Соединетите Американски Држави не ги исполнуваат сите обврски кон ОН.

Тој наведе дека е сигурен оти може многу лесно да ги реши финансиските проблеми на ОН така што ќе ги натера другите земји да ја платат членарината, но само ако ОН го побараат тоа. Трамп одби да каже дали САД ќе ги исплатат милијардите долари што им ги должат на ОН.

Сè што треба да направам е да ги повикам овие земји … ќе испратат чекови за неколку минути, наведе Трамп.

Високи функционери на ОН предупредија дека светската организација би можела да биде принудена да ги намали операциите или дури и да го затвори седиштето во Њујорк, доколку остане без готовина, пренесе „Њујорк тајмс“.

– Мислам дека тоа не е соодветно. ОН не треба да ги напуштаат Њујорк и Соединетите Американски Држави, бидејќи ОН имаат огромен потенцијал, рече Трамп. Тој наведе дека ОН ќе ги решаваат воените конфликти кога тој повеќе нема да може да го прави тоа.

Трамп се повлече од голем број мултилатерални институции и во првиот и во вториот мандат, а во јануари потпиша извршна наредба за повлекување на САД од 66 организации, агенции и комисии, вклучувајќи ја агенцијата на ОН за население и договорот на ОН со кој се воспоставуваат меѓународни преговори за климата.

Share on Facebook

Tweet

Follow us

Save