Бил Клинтон денеска сведочи зад затворени врати: Ќе зборува за неговите врски со Епстин

Поранешниот американски претседател Бил Клинтон денес треба да сведочи зад затворени врати пред конгресниот панел за неговите врски со покојниот сексуален престапник Џефри Епстин.

Сведочењето на Клинтон, закажано за 17 часот по средноевропско време, ќе следи по сведочењето на неговата сопруга и поранешна државна секретарка Хилари Клинтон. Таа му кажа на Комитетот за надзор на Претставничкиот дом дека не се сеќава дека некогаш се сретнала со Епстин и дека нема што да сподели за неговите сексуални злосторства.

Но, Бил Клинтон летал со авионот на Епстин неколку пати на почетокот на 2000-тите откако ја напуштил функцијата, а меѓу милионите документи објавени од Министерството за правда на САД се негови фотографии со жени чии лица се затемнети. Тој негираше какво било кривично дело и изрази жалење за неговата поврзаност.

Претседателот на панелот, републиканецот Џејмс Комер од Кентаки, рече дека Клинтонови не се обвинети за кривично дело, но дека мора да одговорат на прашања за вмешаноста на Епстин во нивната добротворна фондација.

Тие се согласија да сведочат во близина на нивната главна резиденција во Чапакуа, Њујорк, откако Претставничкиот дом се закани дека ќе ги обвини за непочитување на Конгресот затоа што одбиле да соработуваат. Некои демократи го поддржаа потегот.

Клинтонови ги обвинуваат републиканците дека спроведуваат партиски процес дизајниран да го заштити претседателот Доналд Трамп од контрола, истакнувајќи дека на другите во истрагата им било дозволено да поднесат писмени изјави наместо да сведочат лично.

Епштајн почина во затвор во 2019 година, соочувајќи се со обвиненија за трговија со луѓе. Неговата смрт беше прогласена за самоубиство.

Share on Facebook

Tweet

Follow us

Save