CNN: САД немаат јасна опција за завршување на војната во Персискиот Залив

Конфликтот меѓу САД и Иран влегува во сложена фаза, при што американскиот претседател Доналд Трамп се соочува со сериозен недостаток на јасна стратегија за излез, оценува CNN.

По неколкудневна остра реторика, Трамп најави можност за деескалација, тврдејќи дека се постигнати одредени точки на договор во разговори со Иран. Сепак, официјален Техеран ги негираше ваквите тврдења, потенцирајќи дека не биле водени никакви преговори.

Анализата посочува дека и двете страни можеби се свесни за високата цена од понатамошна ескалација. Потенцијалниот судир би можел да предизвика сериозни последици врз глобалната економија, особено поради заканите за затворање на Ормутскиот теснец – клучна точка за светската трговија со нафта.

Во исто време, непредвидливите изјави и честите пресврти во ставовите на Трамп ја намалуваат довербата во американската политика. Според CNN, неговата администрација не понудила јасно образложение за војната ниту конкретен план за нејзино завршување.

Дополнително, одлуката за привремено запирање на нападите доаѓа во период на нестабилност на финансиските пазари. Дел од аналитичарите сметаат дека ваквите потези се насочени кон смирување на економските турбуленции, што делумно се потврди со растот на берзанските индекси и падот на цената на нафтата.

Сепак, воената опција останува неизвесна. Американските сили во регионот сè уште не се целосно позиционирани за евентуални пошироки операции, додека Иран покажува способност да влијае врз глобалните текови преку контролата на стратешките поморски рути.

Условите што ги поставува Вашингтон, како што се ограничување на нуклеарната програма и балистичките ракети, се оценуваат како тешко прифатливи за Техеран, што дополнително го комплицира можниот дипломатски процес.

Share on Facebook

Tweet

Follow us

Save