Нетанјаху прифати преговори со Либан, Трамп наводно ѝ поставил ултиматум на Европа

Кревкото двонеделно примирје меѓу САД и Иран е сериозно доведено во прашање по силните напади на Израел врз Либан, во кои, според либанската цивилна заштита, загинале најмалку 254 лица. Ескалацијата дополнително ја зголеми неизвесноста околу Ормускиот теснец, при што Техеран се закани дека ќе го затвори овој клучен поморски коридор доколку Израел продолжи со нападите.

Во меѓувреме, милитантната група Хезболах соопшти дека испукала ракети кон северен Израел, обвинувајќи за „кршење на примирјето“.

Нетанјаху најави преговори
Израелскиот премиер Бенјамин Нетанјаху изјави дека Израел ќе започне преговори со Либан, во обид да се намалат тензиите. Сепак, нападите врз главниот град Бејрут, најинтензивни од почетокот на вклучувањето на Хезболах во конфликтот сериозно ги загрозуваат дипломатските напори.

Според германски медиуми, американскиот претседател Доналд Трамп ѝ поставил ултиматум на Европа поврзан со безбедноста на Ормускиот теснец. Истовремено, Белата куќа соопшти дека првичниот ирански план од 10 точки бил отфрлен.

Меѓународен притисок и реакции
Велика Британија, Франција, Италија и Шпанија ги осудија израелските напади и повикаа на почитување на примирјето. Францускиот претседател Емануел Макрон ги повика Трамп и иранскиот претседател Масуд Пезешкијан да го прошират договорот за примирје и на Либан.

Од друга страна, САД нагласуваат дека Либан не е дел од постојниот договор за прекин на огнот.

Нови тензии и ризици
Иран повторно ги отфрли американските барања за ограничување на својата нуклеарна програма, оценувајќи ги како „нереални“. Во меѓувреме, поради опасност од морски мини, Техеран објави алтернативни рути за бродовите што минуваат низ Ормускиот теснец.

Развојот на настаните укажува на сè подлабока криза, со ризик од поширока регионална ескалација и дополнителен притисок врз глобалната економија.

Share on Facebook

Tweet

Follow us

Save