Нови правила за увоз на челик во ЕУ: Ако се надмине дозволената квота, ќе има царина од 50%

Европската унија ги заострува правилата за увоз на челик, а со цел да ги заштити домашните производители од зголемената конкуренција на светскиот пазар.

Доцна синоќа, претставници на земјите-членки и на Европскиот парламент се согласија годишната квота за бесцарински увоз на челик да биде ограничена на 18,3 милиони тони, што е намалување од околу 47% во однос на досегашното ниво.

„Дополнителниот увоз над утврдената квота ќе биде оптоварен со царина од 50%, двојно повеќе од претходната стапка“, се наведува во соопштението.

Новите мерки имаат за цел да го заштитат пазарот на Унијата од прекумерната светска понуда, а со договорот точно се утврдува и распределбата на бесцаринските квоти за државите извознички на челик, со задржување одредена флексибилност. Неискористените квоти ќе може да се пренесуваат од еден во друг квартал.

Регулативата која се применува сега истекува на 30 јуни, а за новите правила да стапат во сила потребно е одобрување од земјите-членки и Европскиот парламент, што претставува само процедурална формалност.

Share on Facebook

Tweet

Follow us

Save