Левица: Владата да воведе данок на екстра профит за енергетските компании

Владата да воведе данок на екстра профит за енергетските компании, предлага Левица по примерот на неколку земји членки на ЕУ кои имаат сличен предлог.

– Пет земји од ЕУ бараат данок на екстрапрофит за енергетските компании. Ова прашање е целосно релевантно и за Македонија. Особено во услови кога нема доволно јасна контрола врз тоа што се случува со количините што биле во оптек, со ефектите од поволните промени на цените на енергенсите и со состојбата на комерцијалните залихи.

Ако за трговците има подобри услови, пониски набавни цени или поволни пазарни движења, тогаш тоа мора да го почувствуваат и граѓаните, а не неколку фирми со енормно зголемување на профитите. Во спротивно, станува збор за класично прелевање на кризата врз народот, додека фирмите профитираат.

Кога народот плаќа поскапи сметки, поскап превоз и поскап живот, а компаниите прават милионски добивки од кризата, тогаш тоа не е успех, туку грабеж спакуван како пазар. Според тоа, оние што профитираат од кризата, мора повеќе да придонесат за општеството. Данокот на екстрапрофит не е казна, туку минимум правда.

Не смее повторно товарот да падне врз народот, а бенефитот да остане кај големите компании. Потребна е контрола, транспарентност и јасна политика што ќе обезбеди секоја поволна промена на цените и секое движење во залихите да биде во интерес на јавноста, а не на приватниот профит, велат од Левица.

Share on Facebook

Tweet

Follow us

Save