Арбреша Беџети Ферати станала професор на Универзитетот во Тетово без доказ за завршен втор циклус

Голем број органи во рамките на Универзитетот во Тетово се вклучени во противзаконско академско унапредување, соопштија од невладината организација Форум за образовни промени преку прес-конференција. За нив е спорно што наставно-научниот совет на 8 април 2026 година одлучил на тамошна професорка да ѝ се додели академското звање редовен професор.

„Овој случај е показател дека процесот на унапредувањата повеќе нема никаква врска со тоа колку знаеш, туку кого познаваш. Арбреша Беџети Ферати, ангажирана на Медицинскиот факултет и истовремено сопруга на претседателот на Сенатот на Универзитетот во Тетово, успеала да биде унапредена во академски звања спротивно на повеќе од 15 законски и статутарни одредби, според извештајот на Државниот просветен инспекторат. Ова го овозможиле неколку органи, меѓу кои Наставно-научниот совет на Медицинскиот факултет, Сенатот на Универзитетот во Тетово и рецензентската комисија“, изјави Бленди Ходаи, Форум за образовни промени -Тетово.

Од организацијата велат дека информациите ги добиле од Државниот просветен инспекторат со барање до јавни информации. Според нив, Инспекторатот на 8 април, истиот ден кога е доделено унапредувањето има почнато инспекциски надзор на постапката.

„Тука не станува збор за индивидуален случај, туку за добро организирана шема. Покрај прекршувањата на Законот за високото образование, ФОП упатува апел до Јавното обвинителство да ги истражи можните кривични прекршувања како злоупотреба на службена должност, потенцијално фалсификување на документи, како и конфликт на интереси“, објаснува Ходаи, Форум за образовни промени -Тетово.

Телма побара став за изјавите на невладината организација, а телефонски ни беше посочено дека ќе се изјаснат наредната недела.

Share on Facebook

Tweet

Follow us

Save