Трамп со ултиматум за Европа: Имате рок до 4 јули да го ратификувате трговскиот договор со САД

Трамп наведе дека за ова прашање разговарал со претседателката на Европската комисија, Урсула фон дер Лајен, и дека ѝ дал рок до одбележувањето на 250-годишнината од независноста на САД.

„Се договоривме дека има време до роденденот на нашата држава, а во спротивно царините веднаш ќе пораснат на многу повисоки нивоа“, напиша Трамп на својата социјална мрежа „Truth Social“.

Овогодишниот Ден на независноста на САД, кој се одбележува на 4 јули, означува 250 години од прогласувањето на независноста на американските колонии од британската власт.

Фон дер Лајен во четвртокот изјави дека Европската Унија остварила „добар напредок“ кон ратификација на договорот на почетокот на јули.

„Остануваме целосно посветени на неговото спроведување, од двете страни“, порача таа на мрежата „X“.

Европската Унија и САД постигнаа договор минатиот јули, со кој царините за поголемиот дел од европската стока беа поставени на 15 отсто. Сепак, Трамп изрази незадоволство поради бавното спроведување на договорот.

Ситуацијата дополнително ја закомпликува одлуката на Врховниот суд на САД од февруари, со која беше заклучено дека Трамп ги пречекорил своите овластувања при воведувањето широк спектар царини, вклучувајќи ги и оние кон Европската Унија.

Потоа, американската администрација воведе привремена царина од 10 отсто додека се обидува да најде потрајни начини за реорганизација на трговската политика.

Пресудата, меѓутоа, не влијаеше на секторските царини, како оние на автомобилите, кои според договорот со ЕУ се намалени на 15 отсто.

Бидејќи договорот сè уште чека потврда од државите членки на Европската Унија, Трамп минатата недела се закани со зголемување на царините за европските автомобили и камиони на 25 отсто, обвинувајќи ја ЕУ дека не го почитува својот дел од договорот.

Кипар, кој во моментов претседава со Советот на Европската Унија, соопшти дека сака да го задржи „позитивниот замав“ во разговорите со европарламентарците закажани за 19 мај.

Трамп повторно ја критикуваше Европската Унија на „Truth Social“, истакнувајќи дека веќе долго чека ЕУ да ги исполни обврските од, како што наведе, „историскиот трговски договор“ договорен во Тарнбери, Шкотска.

„Ветено е дека ЕУ ќе го исполни својот дел од договорот и, според договорот, ќе ги намали своите царини на нула“, порача Трамп.

Европскиот парламент на крајот на март даде условна согласност за договорот за царините со администрацијата на Трамп, но европските пратеници побараа дополнителни заштитни механизми пред конечната имплементација на договорот.

Share on Facebook

Tweet

Follow us

Save