Продажбата на користени електрични автомобили во Британија е зголемена за 32%

Продажбата на користени електрични возила во Обединетото Кралство достигна нов рекорд во првите три месеци од оваа година, според Здружението на производители и трговци на автомобили (SMMT). Вкупно 86.943 возила смениле сопственик од почетокот на јануари до крајот на март. Тоа претставува зголемување од 32% во споредба со истиот период минатата година и е највисока бројка досега регистрирана за било кое тримесечје.

Целосно електричните возила исто така го достигнале најголемиот досегашен удел на пазарот, со 4,3%. Податоците на SMMT покажуваат дека тоа е резултат на зголемен избор на пазарот, намалување на цените и владините стимулации за нови електрични возила, кои потоа се прелеваат и на пазарот на користени автомобили.

Вкупно, пазарот на користени автомобили во првото тримесечје останал речиси непроменет, со пад од 0,2% во трансакциите – достигнувајќи 2.016.232 продажби. Продажбата на бензински автомобили паднала за 0,6%, додека на дизел возилата за 6,7%.

– Пазарот на користени автомобили во Британија остана стабилен во првото тримесечје, под влијание на послабиот март во споредба со многу силните резултати во 2025 година. Најдобрата вест е рекордната побарувачка за користени електрични возила, бидејќи растечкиот избор од производителите се пренесува и на пазарот на половни автомобили. Високите цени на горивата, поради конфликтот во Иран, може дополнително да ја зголемат побарувачката, но за да се одржи овој тренд потребно е да се користат сите фискални и политички мерки за да се обезбеди здрав пазар на нови возила со нула емисии кои потоа се префрлаат на пазарот на користени автомобили, изјави извршниот директор на SMMT, Мајк Хејвс.

Иан Плумер, висок директор за клиенти во онлајн платформата за автомобили „Autotrader“, се согласи дека пазарот на користени автомобили „се развива“.

– Трансакциите за користени електрични возила растат и нивниот пазарен удел се проширува. Зголемувањето на цените на горивата – поттикнато од глобалната нестабилност – ги тера сè повеќе луѓе да ги преиспитуваат трошоците за користење, што го забрзува овој процес, рече Плумер.

– Во многу случаи, батеријата ќе трае подолго од самото возило, додаде Џина Бакли, уредничка на сајтот за совети при купување електрични автомобили „Electrifying“.

Според неа, продажбата на користени електрични автомобили расте затоа што луѓето прават пресметки и ги гледаат придобивките: пониски трошоци за користење, помалку подвижни делови, поевтино одржување и батерии кои се многу поиздржливи отколку што претходно предвидувале многу критичари.

Share on Facebook

Tweet

Follow us

Save