Детектор: Синтетички дроги, до 500 пати посилни од хероинот, се нарачуваат преку интернет и се доставуваат по пошта до земјите во регионот

Синтетичките дроги од групата нитазени, кои се до 500 пати посилни од хероинот, лесно се нарачуваат преку интернет и се доставуваат по пошта до Босна и Херцеговина, Србија, Хрватска и Црна Гора, открива денес порталот Детектор од Сараево.

Истражувањето на Детектор покажа дека овие супстанции, кои претставуваат нов сериозен предизвик за регионот, можат да се добијат речиси со еден клик преку апликации како што се Telegram и WhatsApp, а продавачите ги испраќаат користејќи стандардни курирски услуги.

Нитазенот е многу пати појак од фентанилот, а некои варијанти се до 40 пати посилни. Новинарите на Детектор, претставувајќи се како купувачи, беа убедени во директна комуникација дека продавачите нудат испорака до земјите во регионот без никакви проблеми.

Инспекторот на Одделот за борба против злоупотреба на наркотични дроги на Министерството за внатрешни работи на кантонот Сараево, Амер Мулиќ, предупредува дека нитазенот ја пополнува празнината на пазарот откако хероинот речиси исчезна од улиците на Сараево. Тој наведува дека зависниците кои не знаат што земаат лесно можат да се предозираат и да умрат, што веќе се случува во Ирска и Обединетото Кралство.

Директорката на Институтот за медицина на зависности во Сараевскиот кантон, Расема Окиќ, истакнува дека овие супстанции често доаѓаат во форма на прав или течност за вејпинг, што ги прави особено привлечни за младите луѓе. Според неа, во Велика Британија во 2024 година се регистрирани 333 смртни случаи од нитазен.

Експертите предупредуваат дека на полицијата ѝ е многу тешко да ги открие овие пратки, бидејќи станува збор за многу мали количини што лесно се кријат. Продавачите, главно од Кина, се чувствуваат безбедно бидејќи се далеку од европската полиција.

Истражувањето на Детектор покажува дека нитазенот се продава и преку домашни реклами, вклучително и реклами на Хало во Србија.

Share on Facebook

Tweet

Follow us

Save