INFOMAX.MK

По скратена постапка денес во Собранието беа донесени измените на Законот за студентски стандард, со кој покрај другите одредби, се менуваат и процентите на стипендии за студенти од социјални категории, попреченост и студенти кои постигнале особен успех во учењето.

Во членот 49 од Законот се менува ставот 10 и гласи:

„Од вкупниот број на стипендии од ставот (1) на овој член, 40% се за студенти од социјалните
категории и студенти со попреченост и ретки болести, 35% се за студенти кои се запишани на
студиски програми кои се од стратешки интерес за државата и 25% се за студенти кои постигнале
особен успех во учењето.“

Пред измените, членот гласеше: Од вкупниот број на стипендии од ставот (1) на овој член, 49% се за студенти од социјалните категории, 30% се за студенти кои постигнале особен успех во учењето, 20% се за студенти кои се запишани на студиски програми од научните подрачја на природно-математичките, техничко-технолошките, биотехничките и/или медицинските науки и 1% се за студенти кои се запишани на студиски програми на високообразовни установи за образование на наставен кадар во предучилишното воспитание, основното и средното образование.

Законот го поднесуваат пратеничките Иванка Василевска, Каролина Несковска, Ангелинка Петкова, Даниела Христова, Катерина Димитровска, Лидија Петкоски и Рашела Мизрахи од ВМРО-ДПМНЕ.

Во образложението за измените на законот се наведува дека:

Водени од потребата да се има јасност и недвосмисленост во доказите кои треба да ги приложат кандидатите за директор, како и подобрување на одредбите за стипендирање и воведување на нови одредби во однос на реконструкцијата на студентските домови, со предложеното изменување
и дополнување на Законот за студентскиот стандард се допрецизираат условите кои се потребни да ги исполнува кандидатот за директор на студентски дом, се допрецизираат одредбите за стипендирање и се воведуваат нови одредби во однос на реконструкцијата на студентските домови.
Со предложените измени и дополнувања се воведува системска класификација на студентските домови според годината на изградба на објектот, степенот на реконструкција или целосно реновирање и нивото на сместувачки услови, се уредува појасно моделот на финансирање, се прецизира работењето на домовите во услови на целосна реконструкција и се унапредуваат критериумите за доделување на студентски права.

Целосен текст на материјалот на следниот ЛИНК

На ова реагираше подмладокот на Левица. Нивната реакција во продолжение.