Осуден е лажен лекар од Охрид кој на жртвите за еден месец им зел 56.000 евра

Пет и пол години затвор доби измамникот П.С. од Охрид, кој е осуден откако во јануари годинава успеал да измами осуммина пензионери од Штип и Виница, лажно претставувајќи им се како лекар. Тој им се јавувал на луѓето по телефон и им кажувал дека нивни блиски роднини, деца или внуци, се тешко повредени и дека се итно потребни пари за операции. Од наивните жртви, П.С. за само еден месец успеал да земе 56.000 евра.

Според штипскиот суд, измамени се осуммина граѓани.

„(Осудениот) телефонски им се јавувал на лица од постара возраст и им прикажувал лажни факти за штетата на својот имот, доведувајќи ги во заблуда и кажувајќи им дека нивната ќерка има скршеница на нога и оти е потребна итна операција и за тоа се потребни пари. Штетата за сите осум оштетени изнесува 3.472 906 денари или околу 56.000 евра“, соопшти Основниот суд-Штип.

Притворот за осудениот измамник ќе биде продолжен до правосилноста на пресудата.

Share on Facebook

Tweet

Follow us

Save