Рама: ЕУ направи грешка што преговорите со Русија им ги препушти на САД

Премиерот на Албанија, Еди Рама во интервју за естонскиот медиум „Postimees“, меѓу другото ја критикува стратегијата на Европската Унија во надворешните работи и безбедноста на глобалните интереси.

Тој нагласува дека било грешка што Европа им дозволила на САД да ги водат преговорите со Русија.

– Не беше само обична грешка. Според мене, ова е став што не е соодветен за голема сила како Европа, бидејќи историјата на Европа е секако историја на војни, но и историја на дипломатија и преговори. Значи, можеме да ја поддржиме Украина до крај во нивната праведна борба против агресијата, но во исто време не можеме – мислам на Европа – да не разговараме со Русија, вели Рама, објави Топ чанел.

Додал дека „Русија не оди никаде, таа е тука за да остане и мора да се вразуми на еден или друг начин кога станува збор за односите со Европа“.

– Но, Европа исто така треба да бара дипломатија и разговор. Израел и Хамас се задушуваа меѓусебно, но постојано разговараа, оценил тој.

Рама се задржал и на процесот на евроинтеграција на неговата земја, нагласувајќи дека и покрај „предизвиците од бавноста на европските процеси, Албанија останува решена да стане членка на ЕУ до 2030 година, поддржувајќи дипломатски и практичен пристап кон меѓународните односи“.

Share on Facebook

Tweet

Follow us

Save