Трамп ја укинува американската блокада на Ормускиот теснец: Бродовите можат да си одат дома

Претседателот на САД, Доналд Трамп, објави на Truth Social низа услови што Иран, според него, мора да ги прифати во евентуален договор со САД. Тој рече дека Техеран мора да се согласи никогаш да нема нуклеарно оружје и дека Ормускиот теснец мора веднаш да се отвори за непречен бродски сообраќај во двата правци, без никакви такси за премин.

„Иран мора да се согласи никогаш да нема нуклеарно оружје или бомба. Ормускиот теснец мора веднаш да се отвори, без такси, за непречен бродски сообраќај во двата правци“, напиша Трамп.

Трамп изјави дека сите морски мини, доколку ги има, мора да се отстранат. Тој додаде дека американските сили веќе отстраниле или детонирале бројни мини со помош на, како што напиша, „големи подводни миночистачи“.

„Иран ќе го заврши итното отстранување и/или детонирање на сите преостанати мини, кои нема да бидат многу“, објави американскиот претседател.

Според најавата на Трамп, американската поморска блокада сега ќе биде укината, а бродовите што беа заробени во теснецот поради неа можат да почнат да заминуваат. „Поздравете ги вашите сопруги, сопрузи, родители и семејства од мене, вашиот омилен претседател!“, напиша Трамп.

Трамп зборуваше конкретно за збогатениот материјал на Иран, кој го нарече „нуклеарна прашина“. Тој тврди дека се наоѓа длабоко под земја, под планини кои речиси се урнаа по американскиот напад од страна на бомбардерите Б-2 пред 11 месеци. Овој материјал, според Трамп, ќе го ископаат Соединетите Држави, во тесна координација со Иран и Меѓународната агенција за атомска енергија.

„Збогатениот материјал, понекогаш наречен „нуклеарна прашина“, ќе биде ископан од САД, кои се единствената земја покрај Кина со механички капацитет за тоа, во тесна координација и соработка со Исламската Република Иран, плус Меѓународната агенција за атомска енергија, и УНИШТЕН“, напиша тој.

Трамп додаде дека засега нема да се разменуваат пари и дека е договорено и за други, како што ги опиша, „далеку помалку важни“ точки. На крајот од објавата, тој рече дека оди во Собата за ситуации, кризната соба на Белата куќа, за да донесе конечна одлука.

„Сега ќе се состанам во Собата за ситуации за да донесам конечна одлука. Ви благодарам за вашето внимание по ова прашање! Претседател ДОНАЛД Џ. ТРАМП“, објави тој.

Share on Facebook

Tweet

Follow us

Save