Полициската ЕБР го промовираше засилувањето – новите припадници ги прикажаа своите вештини

Kандидатите за прием во Единицата за Брзо Распоредување успешно реализираа показна вежба составена од повеќе етапи, преку кои ги демонстрираа своите стекнати знаења, вештини и подготвеност за извршување на полициските задачи.

Обуката опфаќаше справување со нарушувања на јавниот ред и мир, тактики за воспоставување и одржување на јавниот ред, како и постапки за лишување од слобода и апсење на сторители на кривични дела.

Кандидатите покажаа високо ниво на дисциплина, координација, физичка подготвеност и професионален пристап, потврдувајќи ја својата подготвеност за идните предизвици во служба на граѓаните и безбедноста .
Директорот на Бирото за јавна безбедност, Александар Јанев, кој присуствуваше на завршната вежба на новоселектираните полициски службеници рече дека прикажаните резултати се „потврда за квалитетот на селекцискиот и обучувачкиот процес, како и за континуираните напори на МВР да се создаде стручен, дисциплиниран и мотивиран полициски кадар подготвен да одговори на сите безбедносни предизвици“.

Селектираните кандидати по завршената шестмесечна обука ќе станат дел од оваа елитна и високо специјализирана единица на Министерството за внатрешни работи.

Share on Facebook

Tweet

Follow us

Save