Се заканува ли најсилниот Ел Нињо досега?

Европската служба за климатски промени „Коперникус“ предупредува дека најновите прогнози ја зголемуваат веројатноста за развој на голем Ел Нињо во текот на летото на северната полутопка.

Ел Нињо е природен климатски феномен што се јавува кога се загрева површината на централниот и источниот екваторијален Пацифик. Тоа загревање може да ги промени ветровите, врнежите и временските обрасци во различни делови од светот.

Според „Коперникус“, сегашните изгледи силно одат во насока на умерен до силен, а можно е и силен до рекорден Ел Нињо. Прогнозата ги обединува предвидувањата на девет водечки светски метеоролошки центри, меѓу кои центри од Европа, САД, Австралија и Јапонија.

Околу 75 проценти од моделите предвидуваат дека температурите на морето во клучните зони на Ел Нињо во Пацификот до ноември би можеле да пораснат за 2,5 степени Целзиусови или повеќе. Само еден месец претходно, таа веројатност била околу 50 проценти.

Научниците велат дека таквите прогнози се силен сигнал, бидејќи речиси сите модели од мај до јуни ги коригирале своите предвидувања нагоре. Средната прогноза за ноември, според податоците, надминува 3 степени Целзиусови.

Доколку тоа се потврди, Ел Нињо би ја надминал границата за таканаречен „супер Ел Нињо“ и би се вброил меѓу најсилните досега забележани. Во модерната ера, само три вакви настани ја надминале границата од 2 степени Целзиусови – во 1982/83, 1997/98 и 2015/16 година.

Сепак, научниците предупредуваат дека прогнозите сè уште не се конечни. Иако сигналот е сè посилен, поединечните модели не се целосно усогласени околу тоа колку силен ќе биде феноменот.

Причината за загриженост не е само температурата на површината на морето. Во екваторијалниот Пацифик брзо растат и температурите под површината, каде што се акумулира голема маса невообичаено топла вода. Тоа може дополнително да го засили развојот на Ел Нињо во следните месеци.

Ел Нињо вообичаено го достигнува врвот кон крајот на годината. Неговото влијание врз глобалните температури, сепак, често се чувствува посилно следната година, бидејќи топлината од океаните постепено преминува во атмосферата.

Големите Ел Нињо настани често се поврзуваат со суши во делови од Амазонија, Индонезија и Австралија, нарушени монсуни во Индија и нестабилни врнежи во тропските региони.

Научниците нагласуваат дека посилен Ел Нињо ја зголемува веројатноста за поекстремни временски настани, но не значи дека тие ќе се случат на ист начин во секој регион. Долгорочните прогнози секогаш носат несигурност, а нивната прецизност расте како што се приближува периодот што се прогнозира.

Share on Facebook

Tweet

Follow us

Save