Денес мировни преговори САД-Иран во Швајцарија

Американскиот потпретседател Џеј Ди Венс денеска пристигна во Швајцарија на мировни разговори со Иран, додека двете земји се обидуваат да обезбедат траен крај на војната, но остануваат на спротивставени позиции околу тврдењата на Техеран дека го затворил стратешки важниот Ормуски Теснец, објави „Ројтерс“.

Иако САД и Иран се договорија за 60-дневен прекин на огнот додека траат преговорите, иранската Револуционерна гарда вчера соопшти дека Ормускиот Теснец е затворен. Американската војска, пак, наведе дека трговските бродови продолжиле нормално да пловат низ водениот пат.

Овие случувања би можеле да ги усложнат разговорите, во кои двете страни сакаат да постигнат привремен договор со посредство на Пакистан, потпишан во средата од претседателите Доналд Трамп и Масуд Пезешкијан, за да се стави крај на речиси четиримесечната војна.

Иранската револуционерна гарда предупреди дека бродовите што ќе се приближат до Ормускиот Теснец може да бидат изложени на ризик, обвинувајќи го Израел за напади во Либан кои, според Техеран, ги нарушуваат американските гаранции за прекин на огнот. Теснецот е една од најважните светски маршрути за транспорт на нафта и на гас.

САД, пак, тврдат дека пловидбата не е прекината. Централната команда соопшти дека во саботата низ Ормускиот Теснец поминале 55 трговски бродови со повеќе од 17 милиони барели нафта, додавајќи дека американските сили ќе продолжат да го обезбедуваат слободниот поморски сообраќај.

Доналд Трамп изјави дека за време на 60-дневниот прекин на огнот нема да се наплаќа такса за минување низ теснецот, но не ја исклучи можноста САД да воведат надоместок доколку мировните разговори пропаднат.

Советникот на иранскиот врховен лидер, Мохамад Мохбер, ги обвини САД дека не ја спроведуваат првата точка од привремениот договор, која предвидува прекин на огнот на сите фронтови, вклучително и во Либан. Според него, додека договорот не се спроведе во пракса, испораките на енергенси од Блискиот Исток ќе останат под закана.

Во меѓувреме, прекинот на огнот во Либан останува неизвесен. Либанските власти соопштија дека во израелски напади биле убиени 20 луѓе само неколку часа по стапувањето во сила на примирјето. Израел тврди дека одговарал на напади од Хезболах и нагласува дека не е страна во американско-иранскиот договор.

Анкета во Израел покажува големо незадоволство од исходот на воената кампања. Огромно мнозинство Израелци сметаат дека Иран извлекол поголема корист, а дека целите на војната не биле постигнати.

Share on Facebook

Tweet

Follow us

Save