Расправија за Југославија заврши со убиство: Хрват доби 12 години затвор

Расправија за војните во поранешна Југославија завршила со смртоносен исход во Австрија, а 57-годишниот Хрват вчера беше осуден на 12 години затвор поради убиството на свој пријател, објави „Експрес“.

Инцидентот се случил на 29 ноември минатата година во Виена, во стан на нивна заедничка пријателка. Сите тројца потекнуваат од поранешна Југославија.

За време на дружењето консумирале пиво и „Јегермајстер“, а подоцна било утврдено дека обвинетиот имал 2,2 промили алкохол во крвта во моментот на инцидентот.

Сепак, според психијатриското вештачење, побарано од обвинителството, тој бил навикнат на таква количина алкохол и затоа бил целосно кривично одговорен за своите постапки.

Во текот на вечерта, различните ставови за југословенските војни од деведесеттите години предизвикале жестока расправија во кујната. Жената, која според медиумите била српска националистка, не се согласувала со ставовите на двајцата мажи. Обвинетиот, кој е Хрват, неколку години учествувал во војната, додека жртвата бил босански Хрват.

Според сведочењата, ситуацијата ескалирала кога жртвата станала физички агресивна и наводно ја оттурнала жената на подот.

„Ја удри. Му реков: ‘Што правиш? Дали си луд?’ Тогаш ми се закани дека и мене ќе ми се случи истото. Во тој момент изгубив контрола и сè експлодираше во мене“, изјавил обвинетиот пред судот.

Тој зел нож од кујнската фиока и двапати го прободел својот пријател во грбот. Еден од ударите бил толку силен што му го прободел срцето.

Четириесет и деветгодишниот маж починал на местото на настанот.

„Знам дека го убив. Не сакав тоа да се случи. Сакав само да го повредам“, изјавил обвинетиот за време на судењето.

Одбраната посочила дека обвинетиот немал претходно криминално досие, како и дека самиот ја повикал полицијата и итната помош, а потоа чекал да биде уапсен во дворот.

Пресудата засега не е правосилна.

Share on Facebook

Tweet

Follow us

Save