САД и Иран продолжуваат со нападите, додека меѓусебно се обвинуваат кој го прекршил мировниот договор

Иран и САД ги продолжија нападите во Персискиот Залив, при што меѓусебно се обвинуваат за прекршување на сè покревкиот привремен договор потпишан пред помалку од две недели, чија цел е да се стави крај на четиримесечната војна.

Кратко откако претседателот Доналд Трамп предупреди дека САД би можеле „воено да ја довршат работата“, Иран рано во неделата лансираше ракети и дронови кон американски воени позиции во Кувајт и Бахреин, продолжувајќи ја серијата ескалирачки напади.

Надвор од регионот на Заливот, Израел соопшти дека нападнал борци на Хезболах поддржани од Иран во јужен Либан, додека борбите продолжуваат во област која Техеран ја смета за клучна во мировниот договор со Вашингтон.

Американската војска претходно соопшти дека повторно извршила напади врз Иран, само неколку часа откако танкер беше погоден во Ормускиот Теснец – најважната светска рута за транспорт на енергенси, која Иран во најголем дел ја ограничуваше за време на конфликтот.

Привремениот договор од 14 точки меѓу САД и Иран требаше да ги запре борбите – кои започнаа на 28 февруари по дејствувањето на САД и Израел – и повторно да го отвори теснецот за поморски сообраќај додека продолжуваат разговорите за подлабоки прашања, како што е иранската нуклеарна програма. По рундата посредувани разговори што се одржа во Швајцарија пред една недела, Вашингтон ги ублажи санкциите кон Техеран. Но, оттогаш, борбите и меѓусебните обвинувања се засилија повторно.

„Може да дојде момент кога повеќе нема да можеме да бидеме разумни и ќе бидеме принудени воено да ја довршиме работата што многу успешно ја започнавме“, напиша Трамп на социјалните мрежи. „Ако се случи тоа, Исламската Република Иран повеќе нема да постои.“. Еден час по објавата, кувајтската армија соопшти дека нејзината противвоздушна одбрана реагира на „непријателски“ ракетни и дронски напади, додека сирени се огласија и во Бахреин.

Иранската Исламска револуционерна гарда (IRGC) соопшти дека нејзините поморски и воздушни сили извршиле ракетни и дронски операции против воени позиции на САД во Кувајт и Бахреин како одговор на неодамнешните напади врз Иран, оценувајќи дека американските напади го прекршиле прекинот на огнот и дека тоа „ќе доведе до целосен прекин на сите дипломатски процеси“. Командата на морнарицата на Гардата предупреди дека американските бази во регионот „ќе доживеат пекол во наредните денови“.

Американски претставник, потврдувајќи ги нападите врз американските објекти, изјави за Ројтерс дека нема информации за американски жртви или значителна штета, но дека ситуацијата и натаму се развива. Неколку часа подоцна, повторно се огласија сирени и во Бахреин, а тамошното МНР ги осуди нападите како намерно и повторено нарушување на суверенитетот и безбедноста на кралството и побара итна седница на Советот за безбедност на ОН.

Претходно, Американската Централна команда соопшти дека извршила нови напади откако танкер под панамско знаме бил нападнат од ирански дрон во саботата. „На Иран му беше дадена можност да го почитува договорот за прекин на огнот, но одлучи да не го направи тоа“, се вели во соопштението. Нападите биле насочени кон ирански системи за воен надзор, комуникации, противвоздушна одбрана, складишта за дронови и капацитети за поставување мини. Иранската државна телевизија IRIB објави дека се слушнале експлозии во Сирик, во јужен Иран, без дополнителни детали.

Во меѓувреме, Израел соопшти дека во неделата ликвидирал припадници на Хезболах вооружени со ракетни фрлачи и погодил лансирна рампа во областа Набатије.

Иран ги обвинува САД дека не ја исполниле обврската од мировниот договор да обезбедат прекин на огнот во Либан, кој Израел го нападна во март во операција против Хезболах.

Иако Израел не е страна во договорот меѓу САД и Иран, Израел и Либан повеќепати прифаќаа примирја посредувани од САД – последното во петокот – но тие имаа ограничен ефект, бидејќи Израел одбива да се повлече од освоените територии, а Хезболах одбива да го предаде оружјето додека израелските сили остануваат на терен.

Share on Facebook

Tweet

Follow us

Save