Бугарите сега се искараа за рускиот патријарх: Во бугарскиот парламент се расправаше дали московскиот патријарх Кирил бил агент на советските тајни служби

„Бугарските безбедносни служби не располагаат со информации дека рускиот патријарх Кирил бил агент на КГБ“. Вака заменик-министерката за надворешни работи Велислава Петрова одговара на прашањето на пратеникот од „Демократска Бугарија“ Ивајло Мирчев.

Самото пратеничко прашање било формулирано вака:

„Дали постојат мислења од Службата за воено разузнавање и од Државната агенција за разузнавање при формирањето на бугарскиот став рускиот патријарх Кирил, познат и како поранешен агент на КГБ со агентурно име ‘Михајлов’, да биде изваден од 21-от пакет санкции против Руската Федерација?“

Одговорот на Петрова гласи:

„Сите предлози за воведување ограничувачки мерки од страна на ЕУ се испраќаат на вниманието на бугарските надлежни органи, вклучително и на Службата за воено разузнавање и Државната агенција за разузнавање. Тие вршат анализа во рамките на своите надлежности и доставуваат мислења. Од двете служби не е добиена информација за активност на патријарх Кирил како агент на КГБ.“

Одбраната на рускиот патријарх Кирил од вклучувањето во 21-от пакет санкции на ЕУ се претвори во приоритетна задача на бугарското Министерство за надворешни работи. Претходно, министерката за надворешни работи изјави дека „блокирањето на финансиски средства на патријархот во банкарските институции“ нема да влијае врз текот на војната, поради што е бесмислено.

Премиерот Радев воведувањето санкции против него го нарече „симболично“ и го изедначи со „крстоносен поход“. Иако санкциите се воведуваат против патријархот како физичко лице и на никаков начин не го засегаат имотот на Руската црква во европските земји, во медиумите блиски до владејачките структури се шират тврдења дека санкциите ќе ја блокираат активноста на руските цркви во странство и слично.

ЕУ сака да воведе санкции против поглаварот на Руската црква уште од 2022 година поради неговата клучна улога во поддршката на војната во руското општество, прогласувањето на војната за „света“ и поради антиевропската агресивна реторика. Под негово раководство овие идеи се шират од рускиот епископат, а свештениците кои не се согласуваат се лишуваат од свештенички чин.

Според швајцарски архивски документи, патријархот Кирил, со световно име Владимир Гундјаев, во 70-тите години на XX век работел за КГБ. Се тврди дека во Женева, каде што служел како претставник на Московската патријаршија при Светскиот совет на црквите, собирал информации под псевдонимот „Михајлов“.

На почетокот на 2023 година, швајцарските изданија „SonntagsZeitung“ и „Le Matin“ објавија материјали од декласифицирани полициски архиви. Според податоците од истрагите, оперативниот псевдоним на Гундјаев бил „Михајлов“, а како главна задача било наведено влијанието врз Светскиот совет на црквите.

Овие податоци потврдуваат дека соработката имала систематски карактер и била координирана од советските специјални служби. Податоците од швајцарските архиви се совпаѓаат со декласифицирани извештаи на КГБ од 90-тите години на минатиот век, во кои се зборува за „агент Михајлов“, кој од 1972 година ги извршувал задачите на КГБ во Женева.

Share on Facebook

Tweet

Follow us

Save