Кучето Цунами херој на Венецуелската трагедија.. Во урнатините најде 25 преживеани

Во моменти кога илјадници луѓе останаа затрупани под урнатините по силните земјотреси што ја погодија Венецуела, еден необичен херој го привлече вниманието на светската јавност. Кучето – спасувач Цунами, осумгодишен мешанец со гени од бордер коли, стана симбол на надежта благодарение на својата исклучителна улога во потрагата по преживеани.

За време на последната спасувачка мисија, Цунами успеал да помогне во пронаоѓањето на 25 преживеани лица затрупани под урнатините на речиси 200 срушени објекти. Покрај тоа, учествувал и во спасувачки операции во кои биле извлечени уште околу 300 луѓе, јавуваат повеќе медиуми.

Снимките од кучето кое неуморно пребарува низ бетонските урнатини, провлекувајќи се низ тесни простори недостапни за спасувачките екипи, брзо се проширија на социјалните мрежи. Цунами е препознатлив и по својата хетерохромија – едното око му е сино, а другото кафеаво.

Неговата животна приказна е подеднакво впечатлива. Пред осум години бил напуштен и живеел на улица, каде што бил изложен на малтретирање. Подоцна бил спасен од здруженија за заштита на животните, а неговиот потенцијал го препознал инструкторот Хорхе Бенс, основач на Центарот за обука на кучиња за интервенции при катастрофи. По долгогодишна обука, Цунами станал сертифицирано спасувачко куче специјализирано за пронаоѓање луѓе под урнати објекти.

Во текот на својата кариера, Цунами учествувал и во спасувачки мисии по свлечиштата во Венецуела во 2022 година, како и по катастрофалните земјотреси во Турција и Сирија во 2023 година.

По последната акција во Венецуела, спасувачките тимови најавија дека Цунами наскоро ќе замине во заслужена пензија. Од напуштено кученце до четириножен спасител на човечки животи, неговата приказна останува силен потсетник дека втората шанса може да создаде вистински херои.

Share on Facebook

Tweet

Follow us

Save