Спасовски за фекалиите во гостиварската вода: По Кочани, не сменивме ништо во системот

„Случајот со загадената вода во Гостивар е уште една потврда дека институциите под оваа власт не функционираат кога се најпотребни за граѓаните. По трагедијата во Кочани, до денес ништо суштински не е променето. Еве, сега го имаме и Гостивар, каде повторно гледаме задоцнета реакција, институционален молк и избегнување одговорност“, рече пратеникот на СДСМ, Оливер Спасовски, во гостувањето на вестите на „Тв Канал 5“.

Тој посочи дека одговорноста мора да ја понесат сите надлежни институции – од Владата и здравствените власти, до Институтот за јавно здравје и сите институции кои имале законска обврска навремено да реагираат.

„За ова што се случува во Гостивар, одговорноста е на сите нивоа – од централно до локално. Досега не слушнав дека некој од министрите чувствува одговорност. Зошто затајувањето на здравствените власти не понуди никаква одговорност? Моментот кога првите 200 граѓани од Гостивар се пријавиле во болница не значел ништо ниту за здравствените власти, ниту за Владата. Првичната реакција следува дури по пет или шест дена“, нагласи Спасовски.

Спасовски потенцираше дека токму ваквото институционално постапување покажува како оваа власт ја води државата.

„ Треба да се признае. Да се признае дека ни се случи Кочани и дека нема никаква промена во системот. И дека сега ни се случува ова што се случува во Гостивар, а институциите една недела молчат и ништо не прават во тој момент“, рече Спасовски и додаде:

„Мора да смениме нешто во системот, инаку вака не оди. Што е сменето после повеќе од година дена во нашиот систем? Ништо, освен промена во законски решенија во кои што се намалуваат условите и критериумите за избор на партиските директори кои што ги поставуваат ВМРО-ДПМНЕ, ЗНАМ и ВЛЕН. На секоја собраниска седница имате по неколку законски решенија во кои што се намалуваат критериумите за избори – се цртаат луѓето кои што треба да бидат на одредени позиции“, кажа пратеникот.

Тој нагласи дека јавноста сè уште нема одговори на најважните прашања – каков бил квалитетот на водата, колку испитувања биле направени и какви биле резултатите од нив.

„До ден-денеска немаме никаков одговор во однос на тоа каков бил квалитетот на водата, колку испитувања биле направени и така натаму. Ако мострите покажале дека водата била исправна, тогаш треба да се утврди што се случило, како се направени тие испитувања и дали извештаите реално ја отсликувале состојбата“, рече Спасовски.

Спасовски посочи дека Институтот за јавно здравје има законска обврска континуирано да ја следи исправноста на водата за пиење и да постапува навремено.

Share on Facebook

Tweet

Follow us

Save