Шок на британско пристаниште: кокаин вреден 230 милиони евра е пронајден во кутии со банани

2,9 тони кокаин скриен во кутии со банани биле пронајдени во британско пристаниште, а вредноста на дрогата се проценува на околу 230 милиони евра, објави Би-би-си.

Британската национална агенција за криминал (НЦА) објави дека припадници на граничната служба ја заплениле пратката во четврток во пристаништето „Лондон Гејтвеј“ во Есекс, источно од Лондон.

Дрогата била скриена во пратка банани од Јужна Америка. Девет мажи биле уапсени, а подоцна ослободени со кауција.

„Ова е многу значајна заплена која ја лишила организираната криминална група што стои зад неа од огромни профити. Ова се пари што не можат да се реинвестираат во нов криминал. Дрогите од класа А уништуваат животи, се токсични и можат да ги уништат нашите заедници“, рече истражителот Дејв Филипс.

Во февруари 2024 година, НЦА и Граничната патрола запленија она што се верува дека е најголемата количина дрога од класа А во Велика Британија досега. Речиси шест тони кокаин беа пронајдени во контејнер во пристаништето „Саутемптон“, исто така скриен во пратка банани од Јужна Америка.

Во октомври 2025 година, британското Министерство за внатрешни работи објави дека за време на „рекордното“ лето е запленет кокаин во вредност од повеќе од една милијарда евра. Помеѓу 1 јуни и 31 август минатата година, припадниците на граничната служба запленија 15,6 тони кокаин.

Share on Facebook

Tweet

Follow us

Save