На дното кај Сицилија откриен римски брод стар повеќе од 2.000 години

На само неколку километри од брегот на Сицилија, на длабочина од 46 метри, археолозите открија остатоци од римски трговски брод стар повеќе од два милениума, со стотици амфори сè уште распоредени на морското дно.

Наоѓалиштето се наоѓа на околу три морски милји од Мазара дел Вало, на западниот брег на островот. Според првичната проценка на италијанските власти, бродот потекнува од периодот меѓу вториот и првиот век пред нашата ера.

Меѓу остатоците се откриени стотици амфори, претежно од типот „Dressel 1A“, карактеристични за трговијата во доцниот период на Римската Република. Ваквите керамички садови најчесто се користеле за транспорт на вино и други производи низ Медитеранот. На дното биле забележани и два оловни делови од сидра, како и уште една оловна конструкција.

Локацијата првично била пријавена од граѓани, по што била организирана заедничка подводна проверка на единицата на карабинерите за заштита на културното наследство во Палермо, Сицилијанската управа за подводно наследство и нуркачката единица на карабинерите од Месина.

Откритието е особено значајно бидејќи товарот може да понуди нови податоци за трговските патишта што ја поврзувале Сицилија со останатите делови од Медитеранот пред повеќе од 2.000 години. Амфорите и нивното потекло можат да покажат од каде пловел бродот, каква стока превезувал и кон кои пристаништа бил упатен.

Италијанските власти засега не планираат веднаш да го извлекуваат товарот. Сицилијанската управа за подводно наследство ќе продолжи со детално документирање и истражување на локалитетот, по што треба да бидат определени и мерките за негова заштита.

Сицилијанските води се меѓу најбогатите подводни археолошки области во Медитеранот. Само во последниот период на островот се истражуваат повеќе римски бродоломи и товари од амфори, чии анализи веќе даваат нови сознанија за трговијата и поморските врски во античкиот период.

Share on Facebook

Tweet

Follow us

Save