„Ова е веројатно најстуденото лето во следните 300 години“

По екстремните топлотни бранови и поројните дождови што го погодија австрискиот регион Тирол, климатолозите предупредуваат дека ваквите временски непогоди ја претставуваат новата климатска реалност. Германскиот метеоролог и климатолог Андреас Јегер порачува дека екстремните температури и силни бури нема да исчезнат. Според неговите проценки, овогодишното лето е веројатно најстуденото што Европа и светот ќе го искусат во следните три века.

Поројните дождови и бројните одрони од кал во Тирол доаѓаат непосредно по интензивниот топлотен бран што го зафати регионот. Климатологот Андреас Јегер посочува дека таков јуни не е забележан од почетокот на милениумот. Заедно со топлотниот бран од 2015 година, ова лето беа измерени едни од највисоките температури во историјата на мерењата. Повеќе од половина од мерните станици, вклучително и оние во австриските Алпи, пријавија историски рекордни жештини.

Во разговор за медиумите, Јегер ја истакна сериозноста на ситуацијата со јасна порака: „Ова е веројатно најстуденото лето во следните 300 години“. Со ова Тој предупредува дека сегашното ниво на топлина, силни бури и екстремни временски услови не се привремена девијација, туку постојана состојба. Јегер нагласува дека климатските промени не се измама, туку чиста физика. Иако граѓаните стануваат посвесни за проблемот поради одроните и жештините, тој предупредува дека одложувањето на мерките поради други кризи повеќе не е можно.

Промените во климата директно ги погодуваат водните ресурси и земјоделството. Додека климата во минатото беше одбележана со студени периоди, денес температурите се доволно високи за раст на растенијата, но водата станува главниот ограничувачки фактор. Недостатокот на снег во планинските предели претставува клучен проблем бидејќи снегот се топи бавно и ефикасно ги обновува подземните води. При брзи поројни дождови, водата брзо истекува без да ја натопи почвата, што создава долгорочни суши.

Share on Facebook

Tweet

Follow us

Save