„Пулс“ без противпожарна заштита и со над 600 гости: Вештаците откриваат како пропустите придонеле за трагедијата

Судењето за трагичниот пожар во кочанската дискотека „Пулс“ продолжува денеска во судницата во „Идризово“, со изведување на градежното вештачење и распит на вештаците кои работеле на него.

На претходното рочиште, професорот од Градежниот факултет при УКИМ и судски вештак Горан Марковски истакна дека анализата покажала сериозни пропусти во функционирањето на системот, како и непочитување на стандардите, прописите и процедурите.

Според неговото сведочење, во објектот практично немало преземено мерки за противпожарна заштита. Немало ниту соодветни излези за евакуација, а капацитетот на просторот бил околу 363 лица, додека во критичната ноќ во дискотеката имало повеќе од 600 посетители.

Марковски посочи и на материјалите употребени во објектот, меѓу кои имало и горлив материјал кој при согорување испушта токсичен чад и горливи капки. Истовремено, дел од конструкцијата покажувал знаци на изложеност на екстремно високи температури – челичните елементи биле деформирани, а биле пронајдени и стопени стаклени шишиња.

Во продолжението на постапката се очекува да бидат разгледани причинско-последичните врски и пропустите поврзани со материјалите, контролата, документацијата, пренамената на објектот и стручниот надзор.

Со денешното изведување на доказите, како што е најавено, треба да заврши доказната постапка на Обвинителството.

Судењето го води судијката Дијана Груевска-Илиевска, додека обвинението го застапува тим од 15 јавни обвинители.

Во пожарот што избувна во „Пулс“ на 16 март 2025 година, за време на настап на групата ДНК, загинаа 63 лица, а повеќе од 200 беа повредени. Трагедијата се вбројува меѓу најтешките во поновата историја на Македонија.

Share on Facebook

Tweet

Follow us

Save