Братучедот на Башар ал Асад осуден на смрт во Сирија

Судијата Фар ал-Дин ал-Арјан го прогласи Васим ал Асад за виновен за, „убиства со умисла на повеќе лица, придружени со тортура и бруталност… класифицирани како злосторства против човештвото и воени злосторства“ и објасни дека е „осуден на смрт за тоа“.

Во април, во Сирија започнаа судења против Башар ал Асад, кој избега во Русија, и други функционери, за злосторства извршени за време на граѓанската војна предизвикана од бруталната репресија на продемократските протести.

Сирија го осуди братучедот на Башар ал Асад на смрт

Васим ал-Асад е првиот член на семејството Асад на кој му се суди откако беше уапсен и приведен во близина на сириско-либанската граница во јуни. Војната ја опустоши земјата од 2011 до 2024 година, оставајќи зад себе повеќе од половина милион мртви, милиони раселени и десетици илјади исчезнати.

Трибуналот утврди дека Васим ал-Асад формирал две вооружени групи лојални на поранешниот режим, кои извршиле напади во близина на Дамаск во кои загинале десетици луѓе. Тој беше прогласен и за виновен за поттикнување граѓанска војна. Други обвиненија, вклучително и трговија со дрога, беа отфрлени поради недостаток на докази.

Иако не држел висока функција, Министерството за финансии на САД го санкционираше Васим ал-Асад во 2023 година, велејќи дека тој водел паравоена единица и бил „клучна фигура во регионална мрежа за трговија со дрога“.

Неговата пресуда може да се обжали до Касациониот суд, највисокото судско тело во Сирија. Новите сириски власти, кои го соборија претходниот режим во декември 2024 година, ветија дека ќе ги повикаат на одговорност оние што се одговорни за злосторствата извршени за време на владеењето на Асад.

Тој живеел во луксуз во земја на сиромаштија и војна

За време на граѓанската војна, Васим ал-Асад се фалел со своите луксузни автомобили на социјалните медиуми, повремено појавувајќи се во воена униформа и вооружен. На 11 август, Башар ал-Асад беше осуден на смрт во отсуство за „воени злосторства“ и „злосторства против човештвото“.

Шест поранешни воени и безбедносни функционери беа осудени во отсуство, вклучувајќи го и Махер, братот на Асад, кој командуваше со 4-та дивизија, елитна воена единица.

Единствениот што се појави на суд, Атиф Наџиб, поранешниот шеф на безбедноста на покраината Дараа, лулката на востанието од 2011 година, исто така беше осуден на смрт за злосторства против човештвото.

Башар ал-Асад избега во Русија во декември 2024 година, придружуван само од неколку блиски соработници.

Share on Facebook

Tweet

Follow us

Save