Русија ќе го реши недостигот со увоз и производството на гориво со понизок стандард

Рускиот вицепремиер Александар Новак на вчерашниот конгрес на партијата „Единствена Русија“ изјави дека Русија очекува да го компензира недостигот од гориво на домашниот пазар со зголемување на увозот и производство на горива од понизок квалитет.

„Да, ние постојано ја следиме ситуацијата. Главните начини за компензација на недостигот се увозот и производството на гориво К-2, К-3 и К-4“, рече Новак, објави ТАСС.

Новак рече дека руската влада очекува зголемување на испораките на бензин на домашниот пазар, меѓу другото, откако неколку рафинерии ќе го завршат ремонтот.

Тој рече дека се подготвуваат предлози за одложување на роковите за модернизација на одредени рафинерии, за соработка со мали и средни производители на гориво и за обезбедување увоз на бензин за снабдување на домашниот пазар.

„Неколку рафинерии веќе повторно почнаа со работа, а во согласност со логистичките можности, очекуваме зголемување на обемот на испораки“, рече Новак.

Руското Министерство за енергетика подготвува предлози за одложување на роковите за модернизација на одредени рафинерии, додека владата сè уште не донела одлука за државна помош за реконструкција на оштетената рафинериска инфраструктура, рече Новак.

Во врска со дизел горивото, Новак рече дека Русија во моментов нема проблеми со снабдувањето, откако извозните количини беа пренасочени кон домашниот пазар.

„Извозот е суспендиран, домашниот пазар е снабден“, рече тој.

Одлука за укинување на забраната за извоз на дизел гориво сè уште не е донесена, а Новак изјави дека забраната ќе остане на сила некое време за да се зголемат залихите пред зимата.

Тој додаде дека, доколку залихите се доволни, одлуката за извоз ќе се донесе оперативно.

Share on Facebook

Tweet

Follow us

Save