(Видео) Вајдел: Ако АфД дојде на власт, Германија ќе го укине еврото и ќе излеземе од Шенген

Копретседателката на Алтернатива за Германија (AfD), Алис Вајдел, изјави дека нејзината партија, доколку влезе во сојузната влада, ќе бара излегување на Германија од еврозоната и Шенген, затворање на националните граници и многу построга миграциска политика.

Вајдел го изјави ова во летното интервју за ZDF.

„Германија беше во многу подобра состојба пред воведувањето на еврото“, рече Вајдел, тврдејќи дека заедничката европска валута ја ослабила германската економија и го намалила богатството на домаќинствата.

„Ќе ги затвориме границите и ќе го напушниме Шенген“

Зборувајќи за миграцијата, Вајдел најави затворање на германските граници и излез од Шенген-зоната.

„Ќе ги затвориме границите и ќе го напушниме Шенген“, рече таа.

Таа, исто така, се залагаше за повеќе депортации и помалку доделување државјанства, вклучително и враќање на Сиријците кои повеќе немаат право на статус на заштита. Вајдел истовремено ги критикуваше лидерските фигури од другите партии и повторно упати критики поради одбивањето соработка со AfD. „Ќе управуваме во првите сојузни покраини. А ќе управуваме и на сојузно ниво“, рече таа.

Вајдел повторно ја отфрли планираната забрана за нови автомобили со мотори со внатрешно согорување и мерките за намалување на последиците од климатските промени.

Алтернативата за Германија (AfD) е основана во 2013 година како евроскептична партија која се спротивставуваше на политиката за спасување на задолжените членки на еврозоната.

Во годините по мигрантската криза во 2015 година, таа силно се помести кон десницата, а во центарот на нејзината политика застана противењето на имиграцијата, како и покритичкиот став кон Европската Унија. Денес, AfD се опишува како десничарска, националистичка и антиимигрантска партија.

Која е Алис Вајдел?

Алис Вајдел е една од двете претседателки на AfD на сојузно ниво, а ја води и пратеничката група на партијата во Бундестагот. Таа се приклучи на AfD во 2013 година, истата година кога беше основана партијата.

Таа е економист по професија. Студирала економија и деловна економија и докторирала во оваа област, а пред да влезе во политиката работела за компании како „Голдман Сакс“ и „Алијанц Глобал Инвесторс“. Поминала неколку години во Азија, претежно во Кина, и зборува мандарински јазик.

Приватниот живот на Вајдел се разликува од традиционалниот профил на партијата, чие раководство честопати ги нагласува конзервативните семејни вредности. Таа живее во истополова заедница и одгледува два сина со својата партнерка.

Share on Facebook

Tweet

Follow us

Save