Зеленски: Велика Британија и Франција го деблокираа производството на ракети за Украина

Украинскиот Претседателот Володимир Зеленски денес изјави дека Украина добила потврда од Велика Британија дека може да продолжи со производството на ракети со долг дострел SCALP, пренесува Анадолија.

Зборувајќи на прес-конференција во Киев, заедно со естонскиот претседател Алар Карис, Зеленски рече дека Франција, исто така, потврдила укинување на ограничувањата и издавање лиценци за ова оружје.

„Добивме потврда од Велика Британија во врска со производството на ракети со долг дострел SCALP. Пред тоа, разговаравме со францускиот претседател Емануел Макрон, кој потврди дека се деблокирани SCALP и лиценците. Ќе дејствуваме“, рече тој.

Велика Британија вчера објави дека одбранбената компанија MBDA би можела да сподели доверливи информации за британските компоненти на ракетата SCALP со Украина, што би му овозможило на Киев да воспостави локални производствени линии.

SCALP е француската ознака за ракетата позната во Велика Британија како Storm Shadow. Станува збор за француско-британска крстосувачка ракета со дострел од повеќе од 250 километри.

Зеленски го опиша потегот како „позитивен“ и „силен“, но не прецизираше временска рамка за почеток на домашното производство.

Тој рече дека Украина очекува во рок од седум до десет дена да има распоред за проектот FREYJA, европско-украинската програма за развој на интегриран систем за антибалистичка одбрана.

Распоредот треба да ги вклучува претстојните состаноци, главните пречки и компаниите или земјите вклучени во нивното решавање, рече тој.

Проектот FREYJA беше лансиран во јули од страна на Интегрираната коалиција за антитубалистичка одбрана, која ја сочинуваат десет земји: Украина, Велика Британија, Франција, Германија, Италија, Холандија, Норвешка, Шпанија, Шведска и Данска.

Се очекува Украина да развие пресретнувачки ракети и фрлач, додека европските партнери ќе придонесат со радари, сензори и други клучни компоненти. Киев објави дека има намера да има прототип на систем до средината на 2027 година.

Зеленски рече дека Норвешка потврдила финансиска поддршка од девет милијарди долари (7,71 милијарди евра) за Украина за 2027 година и дека би можела да помогне во финансирањето на канцеларијата посветена на проектот FREYJA.

Норвешката влада одделно потврди дека нејзината поддршка за 2027 година, во рамките на програмата Нансен, ќе остане на приближно исто ниво како и оваа година, односно околу девет милијарди долари.

Украина доби потврда за испорака на неколку системи за воздушна одбрана Кротала и ракети за нив, како и ракети AIM што се користат за пресретнување на руски ракети, рече Зеленски.

Тој додаде дека Украина добила и дополнителни ракети „Патриот“, без да прецизира нивната количина или добавувачи.

Зеленски рече дека Украина се соочува со недостиг од 27 милијарди долари (23,15 милијарди евра) во буџетот за одбрана и ѝ се потребни околу 10 милијарди долари (8,57 милијарди евра) за да обезбеди достапност на оружје на почетокот на 2027 година.

Кремљ ја критикуваше западната помош за производство на ракети во Украина. Портпаролот Дмитриј Песков вчера изјави дека одлуката на Велика Британија да обезбеди технички информации за компонентите на SCALP „додава масло на огнот“. Тој додаде дека Русија се стреми да ги идентификува и уништи украинските капацитети за производство на ракети.

Share on Facebook

Tweet

Follow us

Save