INFOMAX.MK

Руското министерство за одбрана во неделата соопшти дека се подготвува за големи напади врз енергетската инфраструктура на Украина како одговор од типот „очи за око“ на нападите од Киев.

„Руските сили започнаа подготовки за масовни напади врз објекти во енергетскиот сектор на Украина како одговор на тековните напади од страна на режимот во Киев врз цивилната инфраструктура и врз рускиот нафтен и енергетски комплекс“, соопшти Министерството на Телеграм.

Минатата зима, Москва постојано ги напаѓаше украинските електрани, уништувајќи го енергетскиот сектор на земјата и потопувајќи милиони луѓе во студ и темнина на температури под нулата.

Двете страни веќе неколку месеци ги ескалираа нападите со долг дострел, насочени кон инфраструктура како што се магацини, бизниси, нафтени и пристанишни објекти, како и бродови, зголемувајќи ги цивилните жртви.

Во неделата, руската армија тврдеше дека нападнала фабрика во Киев која произведува азбест и цемент чии магацини, како што се вели, се користеле за складирање експлозиви, како и производител на беспилотни летала и муниција.

Во саботата, рускиот напад врз складиште за муниција во предградието на украинскиот главен град предизвика огромна експлозија и уби најмалку 37 лица.

Украина, од своја страна, нападна рафинерија за нафта со дронови во северозападна Русија, предизвикувајќи пожар, според локалните власти.