INFOMAX.MK

Еврокомесарката за проширување, Марта Кос, објави дека нема да дојде во Србија следната недела, наведувајќи го како причина величањето на поранешниот командант на Војската на Република Срспска, Ратко Младиќ, во Србија по неговата смрт, објави Н1.

„Ратко Младиќ беше осуден за геноцид, злосторства против човештвото и за воени злосторства. Враќањето на неговите останки во Белград ја потсетува Европа на најтемните страници од нашата понова историја“, изјави Кос.

Ratko Mladić was convicted of genocide, crimes against humanity and war crimes. The return of his remains to Belgrade reminds Europe of the darkest pages in our recent history.

The glorification surrounding his death is incompatible with the values on which the EU path is…
— Marta Kos (@MartaKosEU) September 4, 2026

Таа оцени дека неговото величање е некомпатибилно со вредностите врз кои почива европскиот пат на Србија.

„Тој пат бара соочување со минатото, вистинско помирување и почитување на жртвите на воените злосторства“, рече еврокомесарката.

Кос истакна дека вредностите врз кои почива заедничката иднина не се предмет на преговори, додавајќи дека затоа одлучила „во овој момент“ да не ја спроведува планираната посета на Србија.

Комесарката требаше да биде во Белград само два дена по погребот на Ратко Младиќ, кој беше осуден во Хаг за геноцид и воени злосторства. Меѓу другото, таа требаше да присуствува на меѓународниот економски форум Белтокс (BELTALKS).

Според српскиот претседател Александар Вучиќ, објаснувањето на еврокомесарката за откажувањето на посетата е глупаво.

„Објаснувањето беше исклучително кратко, но глупаво, како и обично. ‘Глорификацијата’ на генералот Ратко Младиќ едноставно не кажува кој нешто глорификувал. А кога не можат да најдат ништо конкретно, тогаш се занимаваат со подвозници, надвозници, претпоставувам дека требаше да им забраниме на луѓето да се појавуваат, требаше да забраниме погреби, треба да градиме гробишта за кучиња“, изјави тој денес пред новинарите.

Вучиќ неодамна зборуваше за нејзиното пристигнување во Белград. На 25 август, Вучиќ, кога беше запрашан од новинар да ја коментира изјавата на Марта Кос дека промената на методологијата за пристапување кон Унијата е неопходна бидејќи на ЕУ не ѝ се потребни „тројански коњи“, рече дека тие си ја работат својата работа и се заштитуваат.

„Да бев циник и малку груб, ќе речев дека Марта Кос би сакала да види овци, а не коњи, но не сум, па затоа нема да го кажам тоа. Нека си ја работат работата, нека се заштитат себеси. Не им требаат тројанци, коњи како овој или оној, не им треба ништо. Тие се доволни сами за себе“, рече Вучиќ тогаш.