INFOMAX.MK

Израелскиот министер за одбрана Израел Кац во средата изјави дека израелската армија е подготвена да ја „заврши задачата“ во Газа, по што би следело празнење на палестинската енклава од нејзините околу два милиони жители.

Кац, кој и претходно давал вакви изјави, одговори на критиките од политички противник во пресрет на парламентарните избори во Израел, закажани за крајот на октомври.

Лидерот на новата десничарска партија „Амха Јисраел“ (Народот на Израел), Офер Виндер, во вторникот ги критикуваше израелските власти поради тоа што соопштиле дека во Рафах, на југот на Газа, бил убиен командант на бригада на Хамас.

„Три години војна, пет дивизии се бореа во Газа, а сè уште има еден командант и една бригада на Хамас во Рафах?“, праша Виндер.

Кац одговори дека Израел „веќе го испразнил Рафах од неговите жители, како и 70 отсто од Газа“ од почетокот на војната, која избувна по невидениот напад на Хамас врз израелска територија на 7 октомври 2023 година.

Израелскиот министер исто така рече дека договорот за прекин на огнот со Хамас, постигнат со посредство на САД во октомври 2025 година, бил „од голема вредност за сите Израелци“, бидејќи овозможил враќање на последните заложници кои биле држени во Газа и ја покажал „посветеноста“ на Вашингтон за разоружување на палестинската група.

„Но, сите разбравме дека тоа нема да се случи и армијата е подготвена, штом биде даден мандатот, да го елиминира Хамас, да ја заврши задачата за да можеме да го спроведеме планот за миграција“, изјави Кац.

Кац претходно во септември изјави дека Израел е подготвен да ја испразни Газа од нејзините жители, но дека властите го очекуваат зеленото светло од САД. Според него, Вашингтон прво сака да утврди каде би биле испратени околу два милиони жители на енклавата.

Американскиот амбасадор во Израел, Мајк Хакаби, негираше дека постои план за „присилно раселување на луѓето надвор од Газа против нивна волја“.

Кац планот го опиша како доброволен, тврдејќи дека мнозинството Палестинци сакаат да ја напуштат Газа.

Речиси целото население на Газа во текот на војната било раселено внатре во самата енклава, која е тешко разурната во конфликтот.