Левица до Филипче и Мицкоски: Немаме хипотеки за да бидеме уценувани

Присуството на Левица на јавната трибина „Што по 35 години?” очигледно го наруши удобниот простор во кој 35 години функционира алаш-вериш пазарот помеѓу СДСМ и ДПМНЕ, велат од партијата.

„Денес само ја повторија старата претстава: Мицкоски се обидува да нè смести во политичката орбита на СДСМ, додека Филипче, на прес-конференција со бизарна кореографија и лошо одглумен ентузијазам, нè прогласи за сателит на Мицкоски. Во таа упорна противречност се наоѓа и најдобриот одговор на двајцата. Tолку се навикнати секоја политичка сила да биде нечија, што не можат да прифатат дека Левица е своја и автентична како производ на времето.

По три и пол децении политика сведена на две партиски адреси, најтешко им е да ја прифатат наједноставната можност дека во Македонија созреа политичка сила која не бара дозвола, легитимитет ниту место под сонцето од кој било од нив и, пред сè, нема криминали и корупциски скандали поради кои може да биде уценувана“, се вели во соопштението на Левица.

Од партијата додаваат дека јавноста добро го познава политичкиот багаж на старите партиски раководства и дека Левица, како што велат, нема скриена хипотека што треба да ја отплаќа со противуслуги.

„Затоа не мораме денес да говориме за правда, а утре да го прекројуваме Кривичниот законик во корист на вмровски функционери; да убедуваме обвинители да одмрзнуваат туѓ партиски имот; или заедно со вмровски советници да гласаме ДУП-ови во интерес на бизнис-елитата. Левица настана од непомиреноста со таквиот поредок и од одбивањето бедата и неправдата да се прифатат како судбина. Немаме политички долг што мораме да го вратиме, ниту досие со кое може да ни го стишат гласот“, се наведува во соопштението.

Share on Facebook

Tweet

Follow us

Save